ពីថ្ងៃទី១០ ដល់ថ្ងៃទី២១ ខែកុម្ភៈ ឆ្នាំ២០២៥ កន្លង​មក​នេះ លោកសៀង សុភ័ក្ត្រ អនុប្រធាន​មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. រួមជាមួយ​មន្ត្រី​រាជការមកពី​ទីស្តីការគណៈរដ្ឋមន្ត្រី ក្រសួងការបរទេស និងសហប្រតិបត្តិការអន្តរជាតិ ក្រសួងមុខងារសាធារណៈ ក្រសួងសង្គមកិច្ច អតីតយុទ្ធជន និងយុវនីតិសម្បទា និង​​ក្រសួងកិច្ចការនារី សរុប​ចំនួន​៣៩​រូប បាន​ចូល​រួម​វគ្គ​បណ្ដុះ​បណ្ដាល​រយៈ​ពេល​ខ្លីនៅ​​សាធារណរដ្ឋឥណ្ឌា។

វគ្គបណ្តុះបណ្តាលនេះ ត្រូវបានរៀបចំនិង​សម្រប​សម្រួល​ដោយ​​មជ្ឈ​មណ្ឌល​ជា​តិ​សម្រាប់​​អភិបាល​កិច្ច​ល្អ (NCGG) ដែល​មាន​មូល​ដ្ឋាន​នៅ​ទីក្រុង ​Mussorie ប្រទេស​ឥណ្ឌា និង​ធ្វើឡើងក្នុងបំណងសំដៅពង្រឹងសមត្ថភាពមន្ត្រីរាជការស៊ីវិលនៃព្រះរាជាណាចក្រកម្ពុជា ក្នុងការកសាងគោលនយោបាយសាធារណៈនិងអភិបាលកិច្ចល្អ ក្នុងបរិបទនៃការអភិវឌ្ឍបច្ចេកវិទ្យាតាមរយៈការបណ្តុះបណ្តាលដោយផ្ទាល់ពីសំណាក់ថ្នាក់ដឹកនាំ គ្រូឧទ្ទេសជំនាញៗ និងការចែករំលែកបទពិសោធក្នុងការដឹកនាំនិងគ្រប់គ្រងស្ថាប័ន ជាពិសេសភាពជោគជ័យ និងឈានមុខក្នុងវិស័យឌីជីថលរបស់រដ្ឋាភិបាលឥណ្ឌា។

តាមរយៈអនុស្សរណៈនៃការយោគយល់ ស្តីពីការអភិវឌ្ឍធនធានមនុស្ស ចុះថ្ងៃទី២២ ខែមេសា ឆ្នាំ២០២៤ រវាងក្រសួងមុខងារសាធារណៈនៃព្រះរាជាណាចក្រកម្ពុជា និងក្រសួងបុគ្គលិក បណ្តឹង និងសោធននិវត្តន៍នៃសាធារណរដ្ឋឥណ្ឌា រដ្ឋាភិបាលឥណ្ឌាបានរៀបចំ និងផ្តល់ការគាំទ្រទាំងស្រុងលើវគ្គបណ្តុះបណ្តាលដល់មន្រ្តីរាជការកម្ពុជាចំនួន១០០០រូប ដោយបែងចេកជា២៥វគ្គ។ សូម​បញ្ជាក់​ថា​នេះ​ជា​​វគ្គបណ្តុះ​បណ្តាលលើកទី៩ ក្រោមកម្មវិធី ITEC (Indian Technical and Economic Cooperation)៕