ចាប់ពីថ្ងៃទី២៩ ខែកក្កដា ដល់ថ្ងៃទី២ ខែសីហា ឆ្នាំ២០២៤
ចាប់ពីថ្ងៃទី២៩ ខែកក្កដា ដល់ថ្ងៃទី២ ខែសីហា ឆ្នាំ២០២៤ កន្លងមកនេះ មជ្ឈមណ្ឌលតម្កល់ឯកសារច្បាប់ (ម.ត.ឯ.ច.) ពាក់ព័ន្ធនឹងអ.វ.ត.ក.បានបន្តសហការជាមួយមុខងារសេសសល់របស់អ.វ.ត.ក. ក្នុងកម្មវិធីផ្សព្វផ្សាយរបស់មជ្ឈមណ្ឌលធនធាន អ.វ.ត.ក. ចល័ត នៅតាមវិទ្យាល័យចំនួន៤ នៅក្នុងខេត្តស្វាយរៀង រួមមាន៖ ១.វិទ្យាល័យ ហ៊ុន សែន ស្វាយជ្រុំ , ២.វិទ្យាល័យចំណេះទូទៅ និងបច្ចេកទេសបាវិត ,៣.វិទ្យាល័យស្វាយរៀង និង៤.វិទ្យាល័យ ហ៊ុន សែន ចេក ដោយមានលោកគ្រូ អ្នកគ្រូ និងសិស្សានុសិស្សចូលរួមសរុប២ ៣២០នាក់។
កម្មវិធីផ្សព្វផ្សាយចល័តនេះ មានគោលបំណងសំខាន់ៗក្នុងការផ្សព្វផ្សាយ និងការដាក់តាំងបង្ហាញពីសមិទ្ធផល និងកេរដំណែលរបស់អ.វ.ត.ក., មុខងារសេសសល់របស់អ.វ.ត.ក. ក៏ដូចជាបើកឱកាសឲ្យសិស្សានុសិស្សមានលទ្ធភាពចូលអាន និងសិក្សាស្រាវជ្រាវធនធាននៅក្នុងមជ្ឈមណ្ឌលធនធាន អ.វ.ត.ក. ចល័តនេះផងដែរ។
