ចាប់ពីថ្ងៃទី៨ ដល់ថ្ងៃទី១២ ខែកក្កដា ឆ្នាំ២០២៤ កន្លងមកនេះ មជ្ឈមណ្ឌលតម្កល់ឯកសារច្បាប់ (ម.ត.ឯ.ច.) ពាក់ព័ន្ធនឹងអ.វ.ត.ក.បានបន្តសហការជាមួយមុខងារសេសសល់របស់អ.វ.ត.ក. ក្នុងកម្មវិធីផ្សព្វផ្សាយរបស់មជ្ឈមណ្ឌលធនធាន អ.វ.ត.ក. ចល័ត នៅតាមវិទ្យាល័យចំនួន៥ របស់ខេត្តកំពង់ស្ពឺ រួមមានវិទ្យាល័យហ៊ុន សែន បាត់ដឹង, វិទ្យាល័យកំពង់ស្ពឺ, វិទ្យាល័យហ៊ុន សែន ភ្នំស្រួច, វិទ្យាល័យប៊ុនរ៉ានី ហ៊ុនសែន ចាន់ថ្នាល និងវិទ្យាល័យឧដុង្គ។
កម្មវិធីផ្សព្វផ្សាយចល័តនេះ មានគោលបំណងសំខាន់ៗក្នុងការផ្សព្វផ្សាយ និងការដាក់តាំងបង្ហាញពីសមិទ្ធផល និងកេរដំណែលរបស់អ.វ.ត.ក., មុខងារសេសសល់របស់អ.វ.ត.ក. ក៏ដូចជាបើកឱកាសឲ្យសិស្សានុសិស្សមានលទ្ធភាពចូលអាន និងសិក្សាស្រាវជ្រាវធនធាននៅក្នុងមជ្ឈមណ្ឌលធនធាន អ.វ.ត.ក. ចល័តនេះផងដែរ។
នៅក្នុងរយៈពេល៥ថ្ងៃនៃការចុះផ្សព្ធផ្សាយនេះ មានសិស្សានុសិស្សសរុបចំនួន ៣.៦២៥នាក់បានចូលរួមសិក្សាស្វែងយល់ ក៏ដូចជាចូលរួមស្ដាប់ការធ្វើបទបង្ហាញ និងចូលសិក្សាស្រាវជ្រាវនៅក្នុងកម្មវិធីផ្សព្វផ្សាយរបស់មជ្ឈមណ្ឌលធនធាន អ.វ.ត.ក. ចល័តនេះផងដែរ។
មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. បាននឹងកំពុងសហការយ៉ាងជិតស្និទ្ធជាមួយមុខងារសេសសល់របស់អ.វ.ត.ក. ក្នុងការចូលរួមផ្សព្ធផ្សាយពីសមិទ្ធផលនានារបស់អ.វ.ត.ក. ទាំងនៅក្នុងមជ្ឈមណ្ឌលធនធានរួម, មជ្ឈមណ្ឌលធនធាន អ.វ.ត.ក. ចល័ត ក៏ដូចជាការងាររួមគ្នាមួយចំនួនទៀតផងដែរ៕
